運動會 2 女兒的高光時刻

這是她的高光時刻，我必須紀錄一下。第二個星期的運動會，她的項目是跳高和3000米、400米、4×400米。她是跑最後一棒，壓力大啊。

而早上嘅賽事，因為跳高和3000米是同一時間進行，所以她只跳了第一Round就走咗去報到3000米。上年跳高她是拿下甲組亞軍的。但她說3000米因為未跑過，同埋想畢業前來個最後一試，就去跑了。當日嘅天氣好曬又熱，非常不利；不過其實對其他人也不利。我認為我們有先發優勢，因為我一直訓練她，就是在天氣最熱的時間練習，只是今天比之前更熱更曬。

公開組大約有20多個人跑，起步初段不錯，大約是在中游位置。我給她的意見是留力，不要一開波就衝。平時我們是訓練6公里街跑，所以3公里對她來說是有足夠嘅氣力。

去到第四個圈中段，她一直追上去，停留在第四位置，和頭1、2、3位大約相差不夠2秒時間，約5米左右距離。而我在台上看到，其實第1、2、3都跑得好慢，好像也在留力中。

去到第五個圈，不知為何原本跑得較穩嘅第四名就落後，她補上了第三那個位置。我懷疑係同計分牌顯示「5」有關，嗰個小孩相信係睇錯，以為仲有5個圈要跑，其實佢只有2個圈就完。所以一路跑一路計圈係好重要嘅，那是信心和堅持。

去到第六個圈，佢其實一直咬住1、2，大家都相差不足1秒時間，只有一個身位距離。我心想今次最少可以拿第三都好喇。

去到最後一個圈，佢忽然喺最後400米時衝咗出來。我原定訓練係佢會喺最後200米才加速嘅，她早了200米提前加速了；不過也好，最後可以拋離大約5米左右、1秒距離。事後佢同我講返，原來佢喺最後一圈時，聽到第1同第2嘅「戰略」，第二名問第一名好友話「幾時衝呀」，佢聽到咁，就衝咗出來跑第一。想返起，如果佢冇聽到呢個對話，佢俾人拋離開5米距離嘅話，佢就真係會洩咗氣得第三。

之後佢就一路帶到最後50米，而對方都發力追上，加上對方係校隊，速度明顯佔優，看上去越追越近，大有超過佢嘅情況。佢擰轉頭一望，看到第2、3追上嚟，佢又再發力，結果最後25米俾佢帶到終點，取下人生第一個3000米冠軍，亦係佢學校最後嘅3000米第一名。

總結一下佢嘅成功原因：

1）由我一直陪伴她訓練。

2）佢一直著住對大陸X牌子嘅短跑鞋，又硬又唔掂；佢哋碳板係幾百米嗰啲就得，對住又熱又長嘅運動場，應該用返長跑訓練鞋。我係賽前3天「強迫」佢換咗新鞋，結果佢話落到場好彈好有力。佢就係好鍾意鑽牛角尖，永遠覺得靚重要過一切實用性。

3）佢嘅同學係佢最大嘅原動力，唔係我。因為在場上我最少聽到有5到6個唔同嘅人叫佢個名，所以佢係過圈時都唔停落嚟；平時同我跑佢係跑下行下咁，今次好明顯係佢朋友一路支持佢。佢知道有人在看台上叫佢名，所以佢就唔輸得，堅持下去。

4）佢好運，聽到對方戰略。

5）佢得到充分休息。我制定咗成個星期佢嘅休息同飲食時間，包括俾好多糖、碳水佢食，儲下能量。

佢開心咗幾晚。而我得到嘅係：好多時小朋友就係非不能也，實不為也～之後我就要陪佢讀書考DSE，其實我也想不為也。

接住落嚟就係全體同校長陪跑，我都落咗場玩咗3個圈，真係好曬；佢頂到7個半圈，做爸爸嘅都以佢為榮。下午嘅賽事，佢最後一棒為佢個社拿咗第二，算係有交代喇。