馬伯庸原作改編嘅《敦煌英雄》，終於上映啦！呢套原本預計喺 2024 年上映嘅電影，喺上映前一天突然被撤檔，一直拖到今日先至順利公映。到底點解呢？呢套戲喺完全冇預告、冇宣傳嘅情況下，突然喺國慶前夕空降上映，對我嚟講簡直係匪夷所思。成套戲睇完之後，最直觀嘅觀後感就係：剪輯得支離破碎。
作為中國「鬼才創作家」馬伯庸，成套戲被剪成咁實在係太對佢唔住。套戲原本講述嘅係唐朝「歸義軍」對抗吐蕃嘅故事，但疑因主旋律與審查問題，撤檔後成套戲被改得面目全非。對比三年前嘅預告片，實在令人感嘆。
故事取材於唐代「安史之亂」後，河西走廊與中原斷絕，沙州（敦煌）孤懸西北六十多年。最終沙州百姓喺張議潮嘅帶領下發起「歸義軍起義」，重回大唐懷抱嘅真實歷史。電影嘅靈感源自莫高窟第 156 窟嘅《張議潮統軍出行圖》壁畫，本應以「大唐與吐蕃嘅河西之爭」以及「張議潮抗擊吐蕃」為故事核心。然而喺最終上映嘅簡介同字幕處理中，對部分歷史敏感詞彙（如敵對勢力名稱）進行咗模糊化或避諱改動（例如部分角色介紹將敵方改稱為「河西匪軍」或「匪軍首領」等）；甚至連核心靈魂人物張議潮都被迫改名，實在令人痛心與可惜。
作為一個歷史愛好者，我必須喺度為佢留下真名——張議潮。
張議潮大約出生於公元 799 年（即安史之亂期間）。當時唐肅宗即位，急需調遣西北嘅「河朔隴右軍」回朝平亂。由於主力軍隊被調走，西北邊防出現真空，吐蕃乘虛而入，接連攻陷河西走廊，連河套與沙州（敦煌）亦相繼失守。唐朝貞元七年（781年），沙州喺堅守十幾年後無奈陷落。
只要你番開地圖，你就會明白要係一個孤獨既地方守城60年，同時要打通兩者之間既對接﹗係有幾大既困難
喺吐蕃統治嘅六十多年間，當地漢人被迫改穿吐蕃服飾、改用吐蕃語言，地位低下，但大家內心依然極度渴望「重回大唐」。張議潮出生於敦煌豪門世家，從小目睹鄉親嘅悲慘境遇，於是暗中文武兼修、積攢實力，苦苦等待光復嘅時機。
大家可以試想下：張議潮起兵嗰陣已經 49 歲。喺古代，唐太宗離世都只係 52 歲，張議潮可謂係到了晚年先至舉兵。佢對大唐嘅忠義同耐性，真係非一般人能夠想像！
唐宣宗大中二年（848年），吐蕃內部爆發內亂、勢力衰退。張議潮認為時機成熟，秘密聯合敦煌嘅世家大族、僧侶同廣大百姓發動起義。佢率領起義軍一舉驅逐吐蕃守軍，順利收復沙州（敦煌）同瓜州。
【十隊信使死守孤道】 起義成功後，敦煌與大唐中央相隔數千里沙漠戈壁，中間全被敵對勢力阻隔。張議潮一口氣派出十組救援與報捷嘅信使，向不同方向穿越茫茫大漠前往長安。最終，只有由高僧悟真帶領嘅其中一隊，歷經千辛萬苦、耗時兩年多才順利抵達長安。
大唐朝廷得知西域竟然仲有「孤臣孽子」成功復國，舉國震動！大中五年（851年），唐宣宗正式下詔，封張議潮為歸義軍節度使，統領河西地區。
最終，佢成功收復河西十一州（從今新疆東部一直延伸至甘肅、寧夏一帶）。史書記錄當時嘅盛況係：「西盡伊吾，東接靈武，得地數千里，戶口百萬」，令呢片斷絕百年嘅絲綢之路重獲新生。
隨著張議潮功高震主，加上晚唐朝廷對邊疆藩鎮嘅猜忌，為了表明自己對大唐絕無二心，咸通八年（867年），69 歲高齡嘅張議潮選擇離開自己經營多年嘅敦煌，親自前往長安「入朝」（實質上係作為人質，換取朝廷對歸義軍嘅信任）。
朝廷封佢為司徒、河西萬戶侯，並賜予豪宅，將佢留在長安。咸通十三年（872年），74 歲嘅張議潮喺長安逝世，獲贈太保。然而，唐懿宗實行分化藩鎮嘅政策，只保留張議潮作為瓜沙節度使同觀察使，沒有讓他繼續掌管最重要嘅河西節度使，最終導致第二代整個河西走廊再一次陷入混亂。
張議潮一生為國，可惜連文天祥嘅《正氣歌》都未有為佢留下隻字片語。甚至關於張議潮嘅歷史資料，隨著五代十國期間與吐蕃、黨項嘅戰亂而大量遺失。我地今日能夠睇到嘅第一手資料，幾乎完全依賴敦煌石窟（第 156 窟、158 窟、159 窟和第 161 窟）中嘅壁畫與墨蹟文獻。
我地睇下由張議潮侄子張淮深（第二代歸義軍領袖）時期留落嚟嘅讚文，就知當年嘅功績與坎坷有幾咁深刻：
「其叔，故前河西節度，諱某乙。俠少奇毛，龍驤虎步，論兵講劍，蘊習武經。得孫武白起之精，見韜鈐之骨髓。上明乾象，下達坤形。觀熒惑而芒衰，知吐蕃之運盡。誓心歸國，決意無疑…… 白刃交鋒，橫屍遍野。殘燼星散，霧卷南奔。敦煌、晉昌收復已訖，時當大中二載。題箋修表，紆道馳函，上達天聞。皇明披覽，龍顏嘆曰：『關西出將，豈虛也哉！』…… 西盡伊吾，東接靈武，得地四千餘里，戶口百萬之家。六郡山河，宛然而舊…… 朝廷偏獎，官授司徒，職列金吾，位兼神武。宣陽賜宅，稟實九年之儲；錫壤千畦，地守義川之分。忽遘懸蛇之疾，行樂往而悲來；俄驚夢奠之災，諒有時而無命。春秋七十有四，壽終於長安萬年縣宣陽坊之私第也。詔贈太保，敕葬於素浐南原之禮。」
沒有留言:
張貼留言